Астана қаласы және Қазақстан Республикасының басқа өңірлерінің жүкті әйелдерінде «№ 2 көпбейінді қалалық аурухананың» цитогенетикалық зертханасында сәтті жұмыс істеп тұрған  «Fish-диагностик» бірегей диагностикалық кешенде жүктіліктерінің ерте мерзімінде іштегі ұрықтың хромосомдық ауруларын анықтауға қажетті медициналық-генетикалық зерттеп-қараудан өту мүмкіндігі пайда болды. Бұл тәсіл ДНК-зондтар (FISH тәсілі) амниотикалық сұйықтықтың белсенді емес жасушасын пайдалану арқылы молекулярлық-цитогенетикалық зерттеу асқыну қаупінсіз түтік ішінде зерттеу мүмкіндігін береді. Осы тәсіл басқа дамыған мемлекеттерде сәтті және кеңінен қолданылады, бірақ біздің елімізде ол ТМККК шеңберінде тегін жасалады.

Бүгін №2 көпбейінді қалалық ауруханада Дүниежүзілік жүрек күніне орай емделушілерге арналған шара өтті. Атаулы жиынның басты мақсаты - халықты жүрек дерті жайлы ақпараттандырып, алдын алу және емделу жолын түсіндіру.  

Жиын барысында дәрігерлер жүрекке жүк түсіріп, дертке шалдықтыратын негізгі себептермен таныстырды. Олардың қатарында жиі кездесетіндері қан қысымының жоғарылығы, холестериннің көп мөлшері, шылым шегу, жеміс-жидек пен көкөністі аз тұтыну, артық салмақ, алкоголь өнімдерін пайдалану және гиподинамия.

№2 көпбейінді қалалық ауруханаға Денсаулық сақтау министрі Елжан Біртанов арнайы келіп, мекеменің жұмыс барысымен танысты. Мемлекет басшысы Қасым-Жомарт Тоқаев өзінің Қазақстан халқына жолдауында медициналық қызмет көрсетудің сапасы мен қолжетімділігін қамтамасыз ету мәселесін көтерген болатын. Әсіресе, ана мен бала өлімінің деңгейін төмендету жайы басты проблема. Осы ретте ана мен бала денсаулығын сақтау - денсаулық сақтау жүйесі алдында тұрған маңызды міндеттердің бірі,- дейді министр.

Өкінішке орай, әлемде әйелдердің мерзімінен ерте босану көрсеткіштері төмендер емес. Көптеген адамдарда мерзімінен бұрын дүниеге келген балалардың ары қарайғы тағдыры мен мүгедектікке байланысты сұрақтар туындайды. Жөргекте жетілуге тиісті шақалақтың бабын табу оңай шаруа емес. Аса ұқыпты күтім, жоғары технологиялық құралдарды қолдана отырып сапалы емдеу қажет. Осы ретте Елжан Амантайұлы ауруханамыздағы катамнез және оңалту бөлімшесінің өте маңызды қызмет атқаратындығын атап өтті. Аталмыш бөлімшеде үш жасқа дейінгі балаларға тегін түрде көмек көрсетіледі.

Бүгін №2 көпбейінді қалалық ауруханаға Астана қаласының Қоғамдық денсаулық сақтау басқармасының басшысы Сәуле Қисықова арнайы келіп, жұмыс барысымен танысты. Кездесу кезінде денсаулық сақтау саласындағы өзекті әрі маңызды мәселелер талқыға түсті.

Мемлекет басшысы Қасым-Жомарт Тоқаев екінші қыркүйек күні Қазақстан халқына жасаған жолдауында ана мен бала өлімінің деңгейін төмендету жайын атап өткен болатын. Бүгін бұл мәселені басқарма басшысы да ерекше назарға алып, қоғамдағы өзекті проблеманы шешу жолдарын қарастырды. Сонымен қатар сәби өлімінің негізгі себептеріне талдау жасалды және оның алдын алу бағыттары да тілге тиек етілді. Осы ретте №2 көпбейінді қалалық ауруханада Республикалық аса маңызды акушерлік орталықтың ашылуы қуантарлық жайт дейді, Сәуле Қисықова. Бұл заманауи орталықта акушерлік бағыттағы мәселелердің барлығы терең қарастырылып, барша ел азаматтарына көмек көрсетіледі.

Кездесу соңында келесі жылдың бірінші қаңтарынан бастап Міндетті әлеуметтік медициналық сақтандыру жүйесін енгізуге дайындық барысы сараланды.

Бүгін №2 көпбейінді қалалық ауруханада мекеме қызметкерлерінің жалпы отырысы өтті. Бас дәрігер Иван Ли бастаған жиналыс 2019 жылдың бірінші жартыжылдығында атқарылған жұмысты қорытындылауға арналған. Бас дәрігердің орынбасарлары азаматтарға көрсетілген медициналық қызмет, хирургиялық көмек, амбулаторлық бағыт, әйелдерді босандыру және нәрестелерге күтім жүргізу тұрғысында есеп беріп, статистикалық деректермен бөлісті.

Естеріңізге сала кетейік, 2018 жылдың тамыз айында №1 перинаталды орталық пен №2 қалалық аурухана біріктірілген болатын. Мамандардың айтуынша, бұл өзгерістер өзінің оң нәтижесін көрсетіп отыр. №2 көпбейінді қалалық аурухана қабырғасында өте ауыр халдегі әйелдердің өмірін сақтап қалу деректерінің болуы осыған айғақ. Себебі, кез-келген сәтте әйелдер салалық дәрігерлердің көмегіне жүгініп, ем қабылдай алады. Осылайша, уақыт үнемделіп, барынша нәтижелі медициналық көмек көрсетіледі.

Кез келген мемлекеттің басты байлығы – адам және оның өмірі. Сондықтан болар әлем елдері дамуды демографиялық ахуалдан бастап, халық денсаулығының қамына қарай қарекет етеді. Осы бағытта біздің елімізде де айтарлықтай жобалар қолға алынып, ұлт денсаулығын нығайтуға ден қойылған. Әсіресе, өскелең ұрпақтың дені сау болсын десек, болашақ аналардың денсаулығына үлкен жауапкершілікпен қарауымыз керек. 

Жүктілік – әйел өміріндегі ерекше кезеңдердің бірі. Болашақ ана өзінің денсаулығына, тамақтануына және күнделікті жүріп-тұруына аса мән бергені жөн. Әрдайым дәрігерлердің ақыл-кеңестеріне құлақ асып, нұсқаулықтарын орындағаны да абзал. Бұл ретте емханалар мен стационарлық мекемелер әрдайым байланыста болып, жүкті әйел денсаулығын нығайтуды ортақ мақсат етуі тиіс. Осыған орай бүгін №2 көпбейінді қалалық аурухананың Акушерлік блогында қаламыздағы бірнеше емхананың өкілдерімен арнайы дөңгелек үстел өтті. Бас дәрігердің әйелдерді босандыру бойынша орынбасары Валентина Гергерт пен амбулаторлық қызмет бойынша орынбасары Сәуле Ибраева бастаған жиында болашақ ана денсаулығына қатысты өзекті мәселелер талқыға салынды.

Міндетті әлеуметтік медициналық сақтандыру жүйесі дегеніміз не? Осы сұрақтың жауабын ең алдымен денсаулық сақтау саласында қызмет етіп жүрген азаматтар жете білуі тиіс. Осылайша келесі жылдың 1-ші қаңтарынан бастап іске қосылатын жобаның негізгі артықшылықтары мен тиімді тұстары жайындағы нақты ақпарат қарапайым халыққа жеткізіледі.  Бүгін №2 көпбейінді қалалық ауруханада бас дәрігердің мейіргерлер ісі бойынша орынбасары Мұсабаева Айна Мұратқызы ауруханамыздың медбикелеріне жаңа жүйе бойынша оқыту жұмысын жүргізді.

Міндетті әлеуметтік медициналық сақтандыру (МӘМС) – бұл денсаулық сақтау саласындағы әлеуметтік мүдделерді қорғаудың мемлекеттік жүйесі. МӘМС Қазақстанның барлық сақтандырылған азаматтарына жынысына, жасына, әлеуметтік мәртебесіне, тұрғылықты жеріне, табысына қарамастан, тең дәрежедегі медициналық және дәрілік көмекті қамтамасыз етеді. Міндетті әлеуметтік медициналық сақтандыру –  бұл тұрғындарды ауру, жарақат,  жүктілік, бала туу, мүгедектік, кәрілік жағдайындағы әлеуметтік қорғау үлгісі. Көптеген дамыған елдер тұрмысы төмен, көмекке мұқтаж адамдарға ресурстарды қайта бөлуге мүмкіндік беретін МӘМС жүйесін таңдаған.

Ана сүті – өмір есігін жаңа ашқан сәби үшін теңдесі жоқ қорек. Ананың ақ сүтін ешбір сүт қоспасы алмастыра алмайды. Ғалымдардың соңғы зерттеулері ана сүтінің маңызын күн сайын арттыра түсуде. Осыған орай №2 көпбейінді қалалық аурухананың мамандары аналарға баланы емізудің негізгі артықшылықтары мен пайдасы жөнінде баяндап, ақыл-кеңестерімен бөлісті.

Мамандардың айтуынша, анасының уызына жарып, сүтін екі жасқа дейін емген сәбидің денсаулығы жасанды азықпен қоректенген балаларға қарағанда анағұрлым мықты болады, түрлі жұқпалы ауруларға да сирек шалдығады. Тіпті, жасанды сүт қоспаларында кездеспейтін түрлі қоректік заттар да тек ана сүтінде ғана кездеседі екен. Сондай-ақ, ана сүті сүт безінің қатерлі ісігіне шалдықпау қаупін 10 есеге, жатырдың қатерлі ісікке шалдықпауын 2 есеге төмендетеді.

Күнделікті өмірде түрлі жағдайлардың орын алып, көптеген адамдардың зардап шегу деректері кездесіп жатады. Бір мезетте әрі күтпеген жағдайда болған оқиға емдеу мекемелеріне айтарлықтай жүк артады. Әсіресе, зардап шеккен адамдарға алғашқы көмекті көрсететін дәрігерлер қауымының біліктілігі жоғары болуы тиіс.

Осыған орай бүгін Астана қаласындағы №2 көпбейінді қалалық ауруханада төтенше жағдайда зардап шеккен азаматтар қатарына көмек көрсету бойынша кешенді оқу-жаттығулар өтті. Шараға еліміздің өзге өңірлерінен Жедел медициналық жәрдем станцияларының бас дәрігерлері мен қабылдау бөлімшелерінің меңгерушілері арнайы келіп, тәжірибе алмасты.

Сонымен қатар, ҚР Денсаулық сақтау министрлігі, Нұр-Сұлтан қаласының Қоғамдық денсаулық сақтау басқармасы мен Дүниежүзілік Денсаулық Сақтау Ұйымының өкілдері белсене қатысып, оқу-жаттығу шарасы бойынша өз ойларын ортаға салды.

Ақ халатты абзал жандар адам жанының арашасы болып қана қоймай, көпшілікке үлгі көрсету мақсатында спорттық жарыстарға да белсене қатысуда. №2 көпбейінді қалалық аурухананың қызметкерлері «Салауатты дәрігер – салауатты науқас» атты спартакиадада бақ сынап, жүлделі орындарға ие болды. Астана қаласының медициналық ұйымдары арасында өткен додада біздің мамандар «Жеңіл атлетика» жарысы бойынша I орын, ал «Арқан тарту» жарысынан I I орын иеленді.

Кез-келген адамның дені сау болуы салауатты өмір сүруді қалыптастырумен тікелей байланысты. Осы ретте ақ халаттылар барша ел азаматтарын спортқа ерекше назар аударуға, әрдайым қозғалыста болып денсаулықты нығайтуға шақырды. Айта кетейік, бас шаһарымызда 22 ақпанда бастау алған спартакиада 9 спорт түрінен өтті. Барлығы 38 медициналық ұйым конькимен жүгіру, шахмат, боулинг, үстел теннисі, волейбол, мини-футбол және гір көтеру бойынша жарысқа түсті.

Ұлы Отан соғысы ардагерлеріне құрмет көрсету бүгінгі ұрпақтың басты парызы. Соғыс майданында қан кешіп жүріп, асқан ерліктің үлгісін көрсеткен батырларымыз әрдайым ұлтымыздың мақтанышы болмақ. Осыған орай, Ұлы Жеңіс күні қарсаныңда №2 көпбейінді қалалық ауруханаға қарасты Емдеу-диагностикалық орталығының мамандары ерекше іс-шараны қолға алды.

6 мамыр күні орталықтың үздік дәрігерлері Ұлы Отан соғысының қатысушыларына теңестірілген азаматтарды және тыл еңбеккерлерін қабылдап, консультациялық-диагностикалық көмек көрсетті.  Мерекеге орай ұйымдастырылған «Ашық есік күні» шарасы барысында мамандар 50-ден астам азаматты қабылдады. Мысалы, терапевт қабылдауынан 22 адам өтсе, хирург 14, дәрігер кардиолог 8, ал невропатолог 15 адамды қабылдады. Сонымен қатар, түрлі органдардың ультрадыбыстық зерттеуінен 34, ал ЭКГ-ден 23 адам өтті. Сонымен қатар ақ халаттылар салауатты өмір салтын жүргізу, дұрыс тамақтану бағытында кеңес беріп, еліміздің ардақты азаматтарына барынша көмек көрсетті. Алдағы уақытта мұндай шаралар дәстүрге айналмақ.

        №2 көпбейінді қалалық аурухана дәрігерлері интервенциялық кардиохирургия бағытында өз біліктіліктерін арттырды. Шеберлік сабағы Астана қаласының Қоғамдық денсаулық сақтау басқармасының бастамасын өткен болатын. Оны әлемнің ең жетекші кардиологы, профессор, Мюнхен қаласы Рехтц дер Изар Бірінші университеттік клиникасы және емханасының Бас дәрігерінің орынбасары Кристиан Купатт жүргізді.

 Коронарлық күретамырлардағы эндоваскулярлық араласулардың негізгі әдістерін оқытуға бағытталған шеберлік сабағы 5 күнге жалғасты.  Оған №2 көпбейінді қалалық аурухананың 30 маманы қатысты. №2 көпбейінді қалалық аурухананың мамандары коронарлық күретамырлардағы эндоваскулярлық араласулардың негізгі әдістеріне, сондай-ақ жіті миокард инфарктісі барысындағы қан айналымды қалпына келтірудің эндоваскулярлық әдістеріне ерекше мән берді. Бұдан бөлек, Германияда ангиография барысында                 қолданылатын құрылғылармен етене жақын танысты.